بسم الله الرحمن الرحيم
قبل كل شئ أنا عارف إن الموضوع ده أنا كنت المفروض إنه كان المفروض يتكتب من بدري , و اللي عنده ذرة استعداد للصلح بيننا و بين الجزائر ممكن الموضوع يبقى بالنسباله له تأثير , أما اللي حط في دماغه إن احنا هنفضل طول عمرنا أعداء فده مش هيحصل , و فكرة العداوة بيننا مش هتقدم ولا هتأخر أي حاجة , بالعكس ده أنت كده هتخلي واحد إسرائيلي عدوك بجد يفرح فيك و يتريق و يضحك عليك و يسوأ صورتك مع أخوك قدام العالم كله , أنا مش هتكلم عن أي حاجة في اللي حصل من بداية قرعة التصفيات لحد نهاية الأحداث , و مش هتكلم عن مين اللي بدأ بالغلط , ولا مين اللي ولع الموضوع , ولا هتكلم عن أي حاجة حصلت في الماضي , أنا هتكلم عن مصر و الجزائر بكرة هيبقو إزاي مع بعض ؟؟؟؟
الدكتور لو قفل على جرح من غير ما ينظفه من التلوث لازم هيرجع يفتحه تاني و ساعتها هيلاقي التلوث انتشر , و أنا بطلب ننظف الجرح بإننا نسامح قبل ما الموضوع يكبر أكتر ما هو كبير , و بعدها ننسى اللي حصل لإن عمر ما كانت الخلاف يبقى بين بلدين ( عربيين ) عشان كأس العالم , و لازم نقطع صفحة 18 نوفمبر من أجندة 2009 , و نبدأ نفكر في 2010 و 2011 و السنين الجاية , و إزاي نقدر نرجع الأخوة بيننا و بينهم ؟؟؟؟؟
و إزاي نقدر نرجع المنظر ده لما كل فريق يشجع بلده من غير سب ولا شتايم ولا ضرب ولا مشاكل , و من غير حتى ما نسوأ سمعتنا و خصوصا إننا أبطال إفريقيا 7 مرات منهم 3 على التوالي و ده إنجاز محدش يقدر يحققه .
و لازم نخلي بالنا إن احنا داخلين على بطولة كبيرة ( دوري أبطال إفريقيا ) , و فيها المجموعة الثنية ( الأهلي المصري , الإسماعيلي المصري , شبيبة القبائل الجزائري و هارتلاند النيجيري ) , ده غير إن الماتشات ذهاب و عودة يعني الفريق الجزائري هيجيلنا مرتين , و احنا هنروحله مرتين , و بالمرة نقضيها ضرب في بعض و بلاها بقى عروبة و أخوة و الكلام ده .
يا جماعة ياريت نهدي الموضوع على قد ما نقدر , و ياريت منبدأش احنا باغلط , و حتى لو هم بدأوا بالغلط إحنا لازم نطلب حقنا بكل احترام من غير ما نكسر ولا نضرب ولا نشتم و نبقى في الآخر اسمنا ( بلطجية ) .
و يا رب يكون الموضوع عجبكم و تكونوا استفدتم منه , و أرجوكم نهدي الموضوع على قد ما نقدر , و منشعللهاش و نمشي مع الموجة زي ما بقى يحصل كل يوم
